الثلاثاء، 27 مايو 2008

إلياااااااااااانز *Aliens



جئـ ـ نا ـ في سلااااـ م
جئـ ـ نا ـ في سلااااـ م
ثم فجأة
موهااااهاهاه ...موهاهاهاها ...هاهاهاه
وتنهال طلقات الـ - مش عارفة ماهم فضائيين ومش معروف لهم بيستخدموا ايه- علينا من الأخوة الإيليانز الجاين في سلام ...ده سيناريو(بالانجليزي) جه
من يومين ..........لقيت اخويا قاعد يتفرج على برنامج غربي يتحدث عن
الإخوة الغرباء اللي جايين من الفضاء
لما هايجوا إن شاء الله ...وإزاي إن السينما مصوراهم غلط غلط غلط ...
أكيد لأنهم أحدث من أحدث تصور موتصور في السينما وأقوى من أقوى كارتون مقوي في الأفلام الكرتونية ......واحد عمال يتكلم بحماس واحد من جمهورالكورة و هو بيعاني من أزمة قلبية من فرط الانذهال والحماس وبيقول بصوت عميك ...الفضائين لو جم هايهلكوا الزرع و الضرع (بالانجليزي طبعاًً)
الفضائيين لو جم هايفعصوووووووووونا زي الدبان ...لو جم مش هايبقى عندهم يا اما ارحمني (بالانجليزي ...)........
واحد تاني عاقل وهادي كده مش عارفة متدكتر في ايه مش عارفة ...قعد يقول بصوت
اعمق من الأولاني أن الفضائيين
مش زي اي حاجة تخيلناها لأنهم فضائيين وأنهم مخلوقات هاتبهدلنا بالتكنولوبيا
الرهيييييبة بتاعتها التكنولوبيا اللي هاتخلينا مش هانقدر نغمض عنيك (مش مصدقين إنها كانت بالانجليزي)
وقعد يتكلم عن استراتيجيات مواجهة الفضائين .....آه ياني يا أمي
مش عارفة الراجل ده جاب كلامه منين ولا بيقولوا على أنهي أساس ....
بس الظاهر إنها عقدة الخواجة .....معلش يا جماعة أصل الخواجات بالنسبالهم هم الفضائيين
فتحت بقي انبهارا و سألت اخويا :
هما الناس دي معندهاش طوابير عيش تلمها .....ده هما بذات نفسيهم الإيليانز
يخرب بيت كده ...
يلا عشان الناس تبسط وتسيب كل المشاكل اللي عندها من العيش والخصخصة والغاز
وتوشكى ..و....و.....و ونفكر إزاي نواجه الغزو الفضائي وإزاي نتعامل مع الإخوة الغرباء
وماله إن ماكانش الناس دي تفكر كده مين اللي يفكر.........
ناس بتصرف على حيوانتها الأليفة بس أكتر ما احنا بنصرف على الصحة
العامة للـ......إليانز المحليين بتوعنا ....
يكونش ده السبب يكونش السبب في المشاكل دي كلها إن الأشاعات اللي طلعت على المصرين القدماء
بإنهم إليانز صدقوها وبيعاملونا على إننا ولاد الإيـ ـليانز
للأسف كان نفسي يبقى عندي تلك المساحة من الخيال اللي تسمحلي بأني أتخيل ...ايه اللي هايجذب
الفضائيين للأرض أو لبلدنا .........طيب انجذبوا وجم
برضوه خيالي مش فاضي يفكر هايتعاملوا معانا إزاي
كل الي جاي في بالي دلوقت أن عايزة أجري على لقمة عيشي ..............
مش فاضل عندي وقت أو خيال إنساني يسمح لي
أفكر في الإليااااااااااانز اللي المفروض نجهز نفسنا لأستقبالهم هههههههههه
بدلا من السعي في الطوابير............
ده أنا بيتهيألي من الجوع الناس لو شافت فضائي هاتكله
ويبتدي يظهر عندنا فتاوي من نوع هو أكل الفضائيين حلال والا حرااااااااااام
نفسي يبقى عندنا الحاجة اللي كانت جوانا اللي تخلينا نقدر نفكر ...
بس نفكر في حاجة تانية غير لقمة العيش ...
للأسف حاسة أن كتير مننا بقوا Aliens
ــــــــــــــــــــــــــــــــــــــــــ
*غرباء وتستخدم بصفة خاصة للفضائيين

الأحد، 25 مايو 2008

كوتوموتو خلي بالك منه....


فاكرين الضيف أحمد ....كوتوموتو السينيما المصرية ووجهها الطفولي



الضاحك ....أيوة عضو ثلاثي أضواء المسرح ...باين على وشه طيبة وخفة



ظل وكلام من ده ....



كل ده كويس



وجميل



وزي الفل



وعلى راسي من فوق فوق فوق



بس توصل لحد أنهم يرشحوه لعضوية مجلس الشِعب ...



أهو ده اللي لا ننكن أبدا



صحيح هو كان حلم بس برضوا ولو ....



ده الراجل ميت بقاله يجي أكتر من تلاتين سنة ..



.يمسك عضو مجلس شعب عن دايرة سيدي جابر مكان أبن طلعت مصطفى بتاع ايه؟؟؟؟



لا وكمان ماحدش داخل قصاده يعني بالتزكية .....



يعني كمان مش هانصوت ولا نرقع بالصوت .....



استغفر الله العظيم يا رب........



يلا الحمد لله أنه مارشحش نفسه لحاجة تانية أحسن يكون الحلم كان متراقب ...



بس بتهيألي مكانش هايعملها أصله كان مرشح الحزب الوطني في الحلم ....



يلا ...المهم



كوتـــــــــــــــــــــو مــــو تــــــــــــــــــــو



كومتوموتو خلي بالك منه



لو يزعل طب طب على كتفه



لو يحصله ايه كده مش عارفة تعمل ايه وتلاطفه

السبت، 24 مايو 2008

يا أخواتي على البراءة


يا ختي كميلة يا ختي برئ


يا ختي لطافة وذوق و رقيق


قدامك يعمل خدامك


ذوق ولا حتى تشوفه فـ منامك


بس اديله ضهرك ثانية


تلقى كلامه عنك حاجة تانية


كتر خيرك يا بني كفاية


في جمايلك أصبحت غريق


شخصية بوشوش كدابة


ينهش سيرتك كانه في غابة


يلاقيك الصبح يوردلك


حنية تملا اباريق


عامل فيها طيب وكويس


واد إنما ايه شهم وكيس


وكلامه اسافين رقدالك


اكفينا شره في كل طريق
لما تلاقي كدهه بني آدم
قدامك صاحب ومسالم
ووراك دايما سيرتك شاتم
أعذر مرضه اللي مخليه
منك هايفرقع من الضيق

الثلاثاء، 13 مايو 2008

أفـتـقـدك بـشـدة ......



والدي الحنون /


أوحشتني .....


البعد عنك كسرني......


التاع قلبي للفراق كأنني .....


فقدتك اليوم فقط ..


لا


بل فقدتك من زمن بعيد


لا أدري......


غير أني أستشعر الشوق المرير لكنني


استغفر الله القدير لعلني


أصبر على ألم رهيب


بحنايا قلبي أصابني .


.......................والدي الحنون أوحشتني




والدي الحبيب /

بعد النحية والسلام

كان عندي ليك كتير كلام

عايزة أقولهلك وأحكي

عايزة أشوفك عايزة أبكي

تمشي وتسيبني الألام

والدي الحبيب ......

عارفة أنك مش هاترجع

لو أناديك مش هاتسمع

عارفة وفراقك بيوجع
قلبي الراضي بقضاه

الاثنين، 12 مايو 2008

باحبها حب .....بلدي(2)


وباحبك حب ...بيهيألي أن هاعدي تلال وبحور
بيصورلي أبنيكي قصور
وأِشيل الحزن في قلبك وأزرع بدله حبور
أقوم مـ الحلم ألاقي القلب فـ حبك بات مقهور
وباحبك حب
بيخليني شايف نفسي ..نسر جسور
فارد جنحاته بيحمي سماكي
ولاجل علاكي
يفوت ميت سور
يخلص حلمي أبص ألاقي قلبي المسكين زي العصفور
حايم في سماه غربان وحدادي
هايم ...غلبان بجناح مكسور