صبرك حبة

لما تحس الكون الواسع أضيق من عش العصفور

إن الأرض معاندة الشمس وحواليها مش راضية تدور

وأنك في النص اللي الضلمة غالبة عليه ومش طايل النور

فرج الرحمن منك قرب فاهدى وخلي القلب صبور

يا أخواتي على البراءة

يا ختي كميلة يا ختي برئ

يا ختي لطافة وذوق و رقيق

قدامك يعمل خدامك

ذوق ولا حتى تشوفه فـ منامك

بس اديله ضهرك ثانية

تلقى كلامه عنك حاجة تانية

كتر خيرك يا بني كفاية

في جمايلك أصبحت غريق

شخصية بوشوش كدابة

ينهش سيرتك كانه في غابة

يلاقيك الصبح يوردلك

حنية تملا اباريق

عامل فيها طيب وكويس

واد إنما ايه شهم وكيس

وكلامه اسافين رقدالك

اكفينا شره في كل طريق

لما تلاقي كدهه بني آدم

قدامك صاحب ومسالم

ووراك دايما سيرتك شاتم

أعذر مرضه اللي مخليه

منك هايفرقع من الضيق

باحبها حب .....بلدي(2)

وباحبك حب ...بيهيألي أن هاعدي تلال وبحور

بيصورلي أبنيكي قصور

وأِشيل الحزن في قلبك وأزرع بدله حبور

أقوم مـ الحلم ألاقي القلب فـ حبك بات مقهور

وباحبك حب

بيخليني شايف نفسي ..نسر جسور

فارد جنحاته بيحمي سماكي

ولاجل علاكي

يفوت ميت سور

يخلص حلمي أبص ألاقي قلبي المسكين زي العصفور

حايم في سماه غربان وحدادي

هايم ...غلبان بجناح مكسور

يمكن كنا في يوم أصحاب.....

وكأني مش عارف أنت مين

وكأني ناسي صحبة سنين

هونت عليك هونت عليا

وكأننا ماكناش صديقين

يا ترى كنا صحاب و الا

ده كان حلم جميل ولى

وكل صاحب فينا

عن صاحبه بسهولة أتخلى

العهد اللي ما بنا قطعناه

والود اللي ما بينا بعناه

ونسينا احزان سوا شيلناها

والفرح اللي ما بنا قسمناه

بلدي

تعرفي لما أحبك جامد
وألقى في حبك ده أحزان
لما أحس بحبك فيا
دم بيجري في الشريان

تعرفي لما أدوب في هواكي

وألاقي معاكي

أوجاع قلبي

وأرضى أضحي بروحي فداكي

لما عشانك قلبي يعاني

يدفن فيك أغلى أماني

علشان بس يعيش جواكي

نفسه يلاقي في قلبك فرحه

تمسحي دمعه وتداوي جرحه

يعيش أحلامه فحضنك لما

تحوشي القهر اللي كثير دبحه

تعرفي لما ملامحك تبقى عشقي وهمي

لما أحسك غالية يا بلدي كأنك أمي

لما حمولك تكسر حلمي

لما أحس بلادي في حضنك أني غريب

حبي هواكي نوع مالتعذيب

وأنا جواكي فعز الغربة وتوهتي وألمي

يفضل برده عشق ترابك يجري في دمي

جوا عذابك مسجون فرحي

ويا ريتني أقدر عا السجان

تعرفي لما أحبك جامد

وألقى في حبك ده أحزان

لما أحس بحبك فيا دم بيجري في الشريان

معلهشي خلاص ...ماقولنا معلهش

ومعلهشي
ما يمنعشي...لورا تمشي
وتتخبط و تتلخبط
يفور دمك وتتنطط
وتصحى الليل وماتنامشي
أخينا أصله مقصدشي فمعلهشي
تعيش مخنوق تعيش محروق ماتفرقشي
لأن الفعل بالنية ..وكان ناوي مايغلطشي
أقولك لأ هاتتحاسب
توقولي أصلي ماعرفشي
راح أتبهدل مايرضيكشي
فمعلشي
لأ أتبهدل أنا وياك وتفلقني
مافيش مانع تهزأني
وتعمل كل ما بدالك
مافيش حاجة هاتجرالك
آه يا جمالك ..ماهو أصلك قولت معلهشي
مصاير ناس تشحورها
وكام قصة تحورها
خواطرنا تكّسرها
لكن برضه نقول الحق
واجهناه ما أنكرشي
وقال..يعني.. فيه إنسان مايغلطشي؟
سامحوني أصلي مدرتشي
فمعلهشي

و معلهشي

كلمة تغيظ تجيب اللوم

من الظالم على المظلوم

أصل يا عيني الظالم

حس وقاله معلهشي

عايز ايه تاني مش فاهم

المفروض مايزعلشي

مش قولناله معلهشي