الأحد، 20 مارس 2011

بفضل الله ..رفعنا رؤسنا وبانتظار ان ترتاح قلوبنا

كلام كتير مش لاقية منه غير جملتين ...الحمد لله
الحمد لله ॥ثم الحمد لله
الحمد لله اللي مكن لنا خروج الطاغية من الحكم
ونثق بربنا الكريم العظيم ॥الرحمن الرحيم انه هايريح قلوبنا وقلوب اخواننا الليبين واليمنييين
ويمن عليهم بالنصر
آذركم الله ...هو مولاكم ونعم الوكيل

الجمعة، 17 سبتمبر 2010

مصر هي بلدي ......


كل سنة وانتوا طيبين
كنت عايزة اكتب حاجات كتير لكن قولت في الاول اقفل الموضوع اللي في البوست اللي فات
الاول وبعدين ابقى اكتب اللي جاي على بالي
طيب كنت عايزة اقول ايه ...اني رجعت احب مصر زي الاول ؟؟!!...
انا اصلا متوقفتش عن حبها
اني مش هازعل منها تاني وانها بقت زي الفل؟؟!!
معتقدش ان في حد هايصدقني ..
طيب انا عايزة اقول ايه ؟؟؟
تعالوا بس الاول نستعرض بعض الردود اللي جات لي لما نشرت الموضوع ده على احد المنتديات
وعلى المدونة هنا وبعدين ابقى اقول انا كنت عايزة اقول ايه بالظبط :
دكتور أحمد صاحب مدونة وجه جديد:

رد باشمهندس أحمد (محب الصداقة):


دلوقتي بعد الردود دي قعدت افكر انا كنت كاتبة الموضوع الاولاني مش لاني ناقمة على مصر لا ابدا
انا كنت كاتباه لأني باحب مصر و مكنتش عايزة حبها ده في قلبي يقل بس مش أكتر
يمكن اتكلمت عن عدم حبي لبعض ناس مصر اللي مخلينها وحشة بس الجزئية بجد فكرت فيها جامد بعد
ما قريت رد م. أحمد عن ان مكة كانت بلد كفار لما اخرج اهلها الرسول صلى الله عليه وسلم
ومع ذلك فضل يحبها ...حاجة تانية في رد د.أحمد على نفس الموضوع على المدونة
وهي ان
"هي ايه مصر غير
الوالدين و الأعمام و الاخوال و الأصحاب
و الجيران و الاحباب و الابناء

و سجلي جنبهم ذكريات و وجوه البسطاء"

دلوقتي انا كنت عايزة اقول ايييه ..آه افتكرت
احنا ليه المفروض نحب البلد دي ؟؟؟
في اسباب كتير زي بلد اهلنا و ترابها عظام آبائنا و..و..
طيب دي فعلا اسباب وجيهة لكن في سببين بصراحة يخلوني ارجع اقبل على محبتها بكل اللي اقدر عليه
اولا :
لأن كل بلد فيها وفيها حتى اكبر البلاد قوة وثراء فكثير من مواطنيها يشكون من اشياء كالتأمين الصحي
والبطالة و عدم تأمين مسكن ثابت مع فارق مجهودات الحكومة لكن المشاكل هنا وهناك
ثانيا :
في ناس دفعت حياتها ودمها عشان انا اعيش في مصر حرة مصر كويسة ودول من حقهم علينا ان
احنا نحاول نرد ليهم الدين في الناس اللي ضحم بحياتهم عشانهم ونرجع نصلح في مصر تاني
ثالثا :
في البلدان المتقدمة مش هتلاقي ثواب الاصلاح بالشكل الموجود هنا
رابعا :
لأن بجد البلد دي فيها ناس كويسة جدا مهما قلت نسبتهم او مهما اسودت رؤيتنا الناس دي بينوروا حياتنا
خامسا:
عبد الرحمن واحمد واحمد ومريم وسيف وريتاج
دول ولاد أخواتي ....دول الجيل اللي جي اللي من حقه علينا انه يلاقي وطن قوي وكويس يعيش فيه
هما وكل مولود جي من حقهم علينا يلاقوا وطن وعشانهم لازم نرجع نحب مصر
لأننا مش هانقدر نستلف لهم وطن ..لأن الاوطان المستعارة تعيير موطنيها
و لأن في الاول والاخر دي بلدهم من حقهم يعيشوا فيه ويحبوه يديهم وياخد منهم
وطن ينتموا ليه وينتموا ليهم ....عشان كده انا هارجع احب احب مصر


الأربعاء، 23 يونيو 2010

هو اللي بينا ايه ؟؟؟


سمعت معلومة زمان مفادها إن الطفل اللي بيرضع طبيعي أكثر ارتباطا لأمه وكلما زادت فترة الرضاعة كلما زاد انتماء الطفل لأمه

قعدت افكر في المعلومة دي وانا بسأل نفسي هو انا ليه باحب مصر؟؟

زمان كنت اقعد اتخانق انا وواحد صاحبتي عن علاقتنا بمصر واقولها لأ دي بلدنا لازم نحبها

تقولي اديني سبب أقولها محدش بيحب امه بأسباب والكلام بتاع الافلام ده

كنت آخر لما اتزنق في الكلام معاها اقولها حبي البلد بعيد عن الناس اللي بيبوظوا فيها

وتاخدني الحماسة و اقولها متقولش ايه ادتنا مصر قول هاندي ايه لمصر واحنا مش بندي ليها حاجة وبالتالي نقعد ساكتين

دلوقتي حقيقي حاسة ان مصر ادتنا على قفانا

انا معدتش عارفة احبها ازاي ..حد من الناس اللي لسة بتحب مصر تقولي

سبب يخليني افضل احبها غير انها بلدي من فضلكم ..عارفة انها بلدي وانها غلبانة

وانها صابرة على قرف الناس اللي فيها الناس اللي انا معدتش عارفة افصل بينهم وبين البلد زي ما كنت

عاملة زمان
طب البلد نفسها وحاجات كتير فيها معدلناش فيها حجات كتير بقت مش لأهلها
حقيقي مش عارفة افصل ما بين البلد وناسها طب هافصل بينها وبين مين والا مين .....

الفساد معادش مسؤل كبير ولا رجل اعمال واصل لأ الفساد بقى في موظف صغير ممكن يكون جارك حتى قريبك

فرد من افراد الامن المركزي اللي بيسلوا نفسهم في غير الوقت اللي بيخوفوا بعصيانهم اخواتهم في الشعب

بمعاكسة بنات زي اخواتهم ...الا من رحم ربي

بقى في شحات واقف يشد في ديل سايح وآخد من رمضان موسم شغل

بقى في عامل بسيط أو تاجر بيغلوا على الناس عشيتهم

بقى في عسكري مرور بيفتري على الناس بالجاكت البرتقالي والدفتر الاحمر

ناس اقرب ما يكونوا إليك

بقى فينا يوم ما بنسيب الفساد ده يستشري و بنتفرج بمنتهى السلبية مش ببرأ نفسي بس محتاجة لسبب يخليني

أرجع احس بأني مهتمة بالتغيير في البلد دي للأحسن ..عايزة ارجع اشوفها زي ما كنت باشوفها زمان

عايزة اشوفها وطن ..النعمة اللي اتحرم منها ناس كتير يتمنوا بس لو يقولوا ان لينا وطن

عايزة افتخر وانا باقول اني مصرية ..مش حاسة اني من أرخص البني آدمين في سوق المواطنين

عايزة سبب يخليني احس ان مصر مرضعتنيش لبن صناعي مغشوش

ربنا يصلح حالك وحالنا يا مصر ..

الأحد، 23 مايو 2010

ساكني الظلام


هو أنت ليه عامل كده؟؟


مكسور؟؟


ما جوا منا كلنا حجات كتير متكسرة


و حبة سنين متبعترة


جوانا نفس الكركبات


برانا نفس المشكلة


ايه الجديد ؟؟...


فاكر برفضك للحياة


الكون هايرفض الانبساط


والشمس لما تستتر من ضيها


هاتكسف و تمشي تندب حظها


مش فارقة ويا الكون تكون


ولا فارقة ويا الضلمة تسكن حضنها


الضلمة مش بتشوف بتبلع مين


مسكيييييييييييييييييييييييييييييييييييييين


نقي اكبر حيط و ارزع فيه دمغاك بالقوي


واوعدك ولا الهوا حتى هايسئل انت فين


الاثنين، 1 مارس 2010

ربي وربك الله







اللهم أهله علينا باليمن والايمان والسلامة والأسلام

ربي وربك الله
"دعاء رؤية القمر "



ربي وربك الله

الاثنين، 28 سبتمبر 2009

وَاخْفِضْ جَنَاحَكَ لِلْمُؤْمِنِينَ


في إحد الدروس قيل لنا أنه عندما درس علماء النفس اسباب النجاح وجدوا أن الانسان الناجح هو منتخلو شخصيته مما يسمى بالــ ego أو بمعنى مبسط الغرور أو الأحساس بعلو الذات أو بالأنا
بقابل ناس كتير ولا أبرئ نفسي عندها مشكلة في الاعتراف بالخطأ ..وإذا أعترفت فعندها مشكلة أكبر في الأعتذار ناهينا عن التوقف عن الخطأ إن كان مستمرا أو حتى التسامح والعفو إن كان الخطأ صادر عن الآخر
أحسب جزء كبير من مشاكلنا عموما يرجع لتلك النقطة تلك الأنا ...فإذا رأى الانسان نفسه في قدرهاالطبيعي استقامت له الأمور
تعالوا لنرى أثنين متخاصمين يعرض هذا ويعرض هذا وخيرهما الذي يبدأ بالسلام
يحرص البعض عند حدوث مشكلة ما أن لا يبدأ بالسلام ..و قد تجد تلك الجملة "أأنت عايزني أنا ؟؟أنا؟ّ؟ّ!ّ!ّ!اللي أصالح مش ممكن طبعا" سبحان الله هل ترتفع نفسك إن بدأك الآخر بالسلام ؟؟؟!!!لا يحل لرجل أن يهجر أخاه فوق ثلاث ليال ، يلتقيان : فيعرض هذا ويعرض هذا ، وخيرهما الذي يبدأ بالسلام
الراوي: أبو أيوب الأنصاري المحدث: البخاري - المصدر: الجامع الصحيح
يعني لو أخ ليك غلط فيك هايكون أكبر من غلطة قريب أبو بكر-مسطح بن أثاثة - في أبنته وأمنا السيدةعائشة رضي الله عنهم أجمعين في حادثة الأفك عندما خاض مع الذين خاضوا وكان أبو بكر رضي الله عنه ينفق عليه ..أعتقد مافيش أكبرمن كده ..ومع ذلك عندما حلف ألا ينفق على مسطح نزل قول الله تعالى :
بسم الله الرحمن الرحيم
"وَلا يَأْتَلِ أُوْلُوا الْفَضْلِ مِنكُمْ وَالسَّعَةِ أَن يُؤْتُوا أُولِي الْقُرْبَى وَالْمَسَاكِينَ وَالْمُهَاجِرِينَ فِي سَبِيلِ اللَّهِ وَلْيَعْفُوا وَلْيَصْفَحُوا أَلا تُحِبُّونَ أَن يَغْفِرَ اللَّهُ لَكُمْ وَاللَّهُ غَفُورٌ رَّحِيمٌ "النور 22
فعاد إلى الإنفاق محبة في أن يغفر الله له رضي الله عنه
ألا نحب أن ننفق العفو بيننا محبة أن يغفر الله لنا
ولأن من صفات الذين يحبهم الله ألا يرفعوا من أنفسهم على المؤمنين
بسم الله الرحمن الرحيم
يَا أَيُّهَا الَّذِينَ آمَنُواْ مَن يَرْتَدَّ مِنكُمْ عَن دِينِهِ فَسَوْفَ يَأْتِي اللَّهُ بِقَوْمٍ يُحِبُّهُمْ وَيُحِبُّونَهُ أَذِلَّةٍ عَلَى الْمُؤْمِنِينَ أَعِزَّةٍ عَلَى الْكَافِرِينَ يُجَاهِدُونَ فِي سَبِيلِ اللَّهِ وَلاَ يَخَافُونَ لَوْمَةَ لائِمٍ ذَلِكَ فَضْلُ اللَّهِ يُؤْتِيهِ مَن يَشَاء وَاللَّهُ وَاسِعٌ عَلِيمٌ المائدة 54
ومن صفاتهم أيضا الرحمة بينهم
قال تعالى : بسم الله الرحمن الرحيم
." مُّحَمَّدٌ رَّسُولُ اللَّهِ وَالَّذِينَ مَعَهُ أَشِدَّاء عَلَى الْكُفَّارِ رُحَمَاء بَيْنَهُمْ تَرَاهُمْ رُكَّعًا سُجَّدًا يَبْتَغُونَ فَضْلا مِّنَ اللَّهِ وَرِضْوَانًا سِيمَاهُمْ فِي وُجُوهِهِم مِّنْ أَثَرِ السُّجُودِ ذَلِكَ مَثَلُهُمْ فِي التَّوْرَاةِ وَمَثَلُهُمْ فِي الإِنجِيلِ كَزَرْعٍ أَخْرَجَ شَطْأَهُ فَآزَرَهُ فَاسْتَغْلَظَ فَاسْتَوَى عَلَى سُوقِهِ يُعْجِبُ الزُّرَّاعَ لِيَغِيظَ بِهِمُ الْكُفَّارَ وَعَدَ اللَّهُ الَّذِينَ آمَنُوا وَعَمِلُوا الصَّالِحَاتِ مِنْهُم مَّغْفِرَةً وَأَجْرًا عَظِيمًا" الفتح 29
وبعدين تعالوا نفكر كده شوية أولا هو مين أنا يعني يقول رسول الله صلى الله عليه وسلم :
لايدخل الجنة من كان في قلبه مثقال ذرة من كبرالراوي: عبدالله بن مسعود المحدث: مسلم
فنشيل من نفسنا كلمة أنا دي ونخلينا في كلمة إخوة وونحاول نغلق على الشيطان مداخله بيننا
يقول تعالى :
بسم الله الرحمن الرحيم
"وَقُل لِّعِبَادِي يَقُولُواْ الَّتِي هِيَ أَحْسَنُ إِنَّ الشَّيْطَانَ يَنزَغُ بَيْنَهُمْ إِنَّ الشَّيْطَانَ كَانَ لِلإِنسَانِ عَدُوًّا مُّبِينً"ا سورة الاسراء 54
الشيطان يحاول النزغ ما بينك وما بين عباد الله بعضهم وبعض لذا كان أوجب لهم أن يقولوا التي هي أحسن حتى يسدوا على الشيطان مداخله ..
وأخيرا حكاية حدثت أيام الرسول صلى الله عليه وسلم :
حدث أن تشاد أبو ذر الغفاري وبلال بن رباح رضي الله عنهما فقال له أبو ذر الغفاري يا ابن السوداءيعيره بأمه وكانت أمه أعجمية فشكاه بلال إلى الرسول صلى الله عليه وسلم ، فقال لي النبي صلي الله عليه وسلم ( يا أبا ذر أعيرته بأمه؟ إنك امرؤ فيك جاهلية ، إخوانكم خولكم جعلهم الله تحت أيديكم ، فمن كان أخوه تحت يده فليطعمه مما يأكل ، وليلبسه مما يلبس ولا تكلفوهم ما يغلبهم ، فإن كلفتموهم فأعينوهم) أخرجه البخاري .فما كان من أبو ذر عندما صوبه النبي خطأه إلا أن وضع خده علي الأرض.. وقال لا أرفعه حتىيطأه بلال بقدمه علي مرأى ومسمع من الصحابة يا الله يضع وجهه تحت قدمي بلال لكي يسامحه لله دره
وما كان من رد فعل بلال المعير بأمه من قريب إلا أن عفا ونسى الخطأ في حقه.. وقال ما كانلي إن أطأ وجها سجد لله.
لله درهم سبحانك اللهم وبحمدك أشهد أن لا إله إلا أنت أستغفرك وأتوب إليك

الثلاثاء، 7 يوليو 2009

اسمها مروة ...ممكن نجيب حقها ؟؟؟



واحدة صاحبتي كانت بتحكيلي الموضوع كنت فاكرة الجزء الخاص بقلة الأدب في

المبلغ اللي حكم بيه القاضي بس معلش انا جاهلة ومش عارفة هناك بيحكموا بايه في

الظروف اللي زي دي .....لما الحكومة الألمانية متقدمش أي اعتذار لأن ده حادث فردي

طب مقتل مروة قدام الناس من غير ما حد يتحرك يدافع عنها غي جوزهاحادث فردي

برضه الضابط اللي دخل وضرب على جوزها النار لأنه طبعا مش أبيضاني وبعيون زرق

وباين عليه انه مسلم وبرصاصتين مش رصاصة واحدة حادث فردي .....يبقى بيتهيألي لازم

ناخد موقف من الحكومة الألمانية انا فعلا حاسة بغضب فظيع من الحكومة المصرية أكثر من

الحكومة الألمانية بس للأسف هنقاطع ايه في مصر البضايع وجاية من الصين والقمح وجاي من

بلاد منعرفش شكله ايه ومش فاضل غير إننا نقاطع الهوا اللي بنتنفسه اللي اقصده إن أحنا نعمل

لمواطنينا برة تمن طالما الحكومة مش عارفة تعملهولنا نعرفهم إن دم ولادنا وإخواتنا غالي ...بس

عشان الحوادث الفردية ميتكررش كتير وميتمش التعامل معاه بالبرود ده ......وبعدين حوادث ألمانيا

مع الاسلام مش حاجة جديدة ........

ممكن اقول يعني نبعت أعتراضات للسفارة الألمانية

ممكن اقول نبطل سلبية ونحاول نوصل صوتنا للناس اللي برة
>>> لينك للتواصل مع ميركل المستشاره الالمانيه هنا يمكنك الكتابة بالعربية

ونعرف الناس دي ان الست اللي ماتت دي ليها أهل مش هاقول نحاول نضغط هنا على المسؤلين

عشان يجيبوا حقها بس ممكن يعني أطلب إن أحنا نقاطع البضايع الالمانية الناس اللي دايما

بنسمع عن عنصرية كتير منهم وإسائتهم للمسلمين ممكن نحاول ندعيلها بالرحمة وإن ربنا يصب

ر أهلها وندعي لابنها ربنا يهديه ويكون معاه يا ريت اللي عنده حاجة ممكن نعملها يقولها ونحاول

نجيب جزء من حقها ونعرف الناس ديإن لينا تمن حتى لو حكومتنا مش عملالنا سعر ....يا ريت نبعت

دعوة بمقاطعة ا لبضائع على الأيميل
حسبي الله ونعم الوكيل........ حسبنا الله ونعم الوكيل

السبت، 6 يونيو 2009

افعل شيئا يا مت


مسرحية للكاتب التركي الساخر عزيز نيسن ........كتابات هذا الرجل (ما قرأته منها )تحمل من الألم

الضاحك والعبقرية في الابتكار ما يسحرك حقا لكن هذه المسرحية تميل بشكل غريب للكآبة

وبالرغم عن ذلك فهي تحوي عبارات رائعة تلك التي تجعلك تتوقف عندها لتعيد تأمل حياتك

تدور المسرحية في إطار خيالي عن مت الذي وصل إلى سن توقف النمو ومن ثم لابد وأن يعاينه الطبيب ليحدد

كم سيعيش أو ليقرر إن كان يجب أن يتناول مت السم ...ويتوقف حياة مت أو تناوله السم على أن يفعل شيئا

أي شيئ يفيد من حوله ويرد به الدين لمن سبقوه ومدوه بما ييسر حياته

يقف مت حائرا فهو لا يعرف ما يفعله ليعيش و ويبدأ بالتظاهر بأنه يريد الموت فيما تسري بعروقه غريزة البقاء

و يظهر ذلك في تلك النقوش التي يلوث بها جدران المنزل ويرفض الآعتراف بأنه ورائها فقط ليترك شيئا

لكن ذلك لا يفيد ....يفكر مت في سرقة ما يحاول جده- المحب للعيش- فعله لكي يعيش لكنه لا يستطيع شرح كنه تلك العلبة

الوردية التي يحاول جده جمع ظلام الدنيا بها وذلك كي يحول بين الظلام وبين عامة الشعب الذين يعيشون دون يعاينهم الطبيب

لأنهم لا يعلمون قيمة الحياة لأنهم عاشوا ليموتوا .....

فجأة يقرر مت أن يخرج لعامة الشعب الثائرين الذين يريدون قتله لكي يوضح لهم جهلهم ...

يخرج إليهم بالفعل ويحدثون به إصابة مميته ...ويدخل مت لبيته مرة أخرى ليلفظ أنفاسه الأخيرة لكن بعد أن يعلم الغوغاء بأمر جهلهم

وبأنهم يجب أن يعيشوا لأجل هدف وأن يعملوا شيئا وإلا فسيظلون في الظلام ...

وبذلك يقرر الطبيب أن مت سيعيش لما فعله ربما أطول من أشخاص آخرين

القصة كما ترون رمزية تجعلك تتفكر فيما تعمل وما الهدف من وراء أعمالك وما تقدم لتلك البشرية لتعيش ....لا يهم أن تعيش بأسمك

أو أن يخلد أسمك بل بفعلك كيف تخلد بفعل يرد للبشرية ما عليك من دين لمن سبقوك ...

للذين يعيشون بأجواء ما يقرأون ربما تحمل المسرحية جو كئيب بارد بعض الشيء

لكن عبقرية جملها تغفر لها ذلك الجو الثقيل ......

إن شاء الله أحاول أنزل لكم مسح ضوئي لأول القصة به ملخص أفضل من ذلك لها

الاثنين، 4 مايو 2009

يقولون رحل



بدا الجو مشحونا ً هناك شيء ما يعيث توترا في الجو صوتنحيب يأتي من بعيد يخبرهم بموته ،بالرغم عن ان جميع الموجودين لا يهتمون لموته أو حياته سرعان ما سيبدأونمراسم الدفن ومن ثم مراسم التتويج لكن ذلك لم يمنع منتسمرهم لدقائق يستوعبون فيها ما يحدث ،لقد مات ..بعد أن جثم على أنفاس المملكة زمنا طويلاً ظن فيها أهلها أنه يمتلك عمر أبليس ،ربما هو لن يموت ،لكنه مات رغم كل شيء أخيرا قد أثبت بشريته ، انتشر الخبر داخل البلاد وبدا أن الشعب يرفض التصديق لقد توحد وجوده الطاغي بكيانهم شيء فشيء بدا اليقين يتسلل ليحتل شيء من العقول فبعد كل شيء هو فان وهذا يعني أنه يجب ان يموت ...بدا موته للشعب وكأن عصرالمعجزات قد جاء ،أحد منهم لم يفكر أن سيستغرقهم دهرا طويلا ربما أحقابا آخرى لتحدث معجزة أخرى ليموت الملك الجديد ....يقولون رحل ...لكنه لم يفعل إلا بعد أن أخذ منهمذلك النبض بكيانهم ...يمكنه الرحيل دون أن يضايق ولي عهده أحد ..حتى يثبت- الملك الجديد - بشريته هو الآخر ليرحلمخلفا ولداً آخر يحكم ذلك الكيان المنهك .

الثلاثاء، 24 مارس 2009

أرحموا يتيم أم ذل


يمكن موضوعي ده متأخر حبتين

لكن بجد عايزة أتكلم فيه


مش هاقعد أتكلم وأعيد وأزيد في فايدة أو عدم فايدة الأعياد الموضوعة ولا حكمها الديني


ولا حتى إننا نراعي الترجمة الصحيحة للكلمة باللغة العربية فنقول يوم الأم بدل من عيد الأم


ولا إن الله يسامحه على أمين وأخوه لأنهم المفروض كانوا ياخدوا عمولة من بياعين الورد والهدايا على


الأعياد البدعية اللي دخلوها علينا


كل الحاجات دي متفرقش من بعيد أو قريب في الموضوع اللي هاتكلم فيه


خلونا في المهم ...اليوم ده بيعدي إزاي على يتيم الأم - حفظ الله أمهاتنا من كل سوء- بس بجد الموضوع


صعب قوي في ناس بجد بتتجنب تنزل اليوم ده عشان متشوفش عجزها عن تكريم الأم في عيون فرحانه


بهداياها لأمهاتها ....


قالوا بأن اليوم عيد ما جاء فرح أو دعاني


بها يحتفون ويفرحون وأنا وقلبي نشقى بالأحزاني


يا ريت يا جماعة الناس تاخد بالها من الفئة دي كل ما تيجي تتكلم عن الهدية اللي هي جايباها


او حتى لما تتكلم عن حاجة خاصة باليوم ده


الثلاثاء، 10 مارس 2009

بلعهم بكوبايتين أحتسااااب


بقالي كام يوم عايزة انزل البوست ده أكلم بيه نفسي كالعادة ...الظاهر المدونة مش بتقوم بواجب الضيافة

ايه الموضوع ؟؟...امممممم بصراحة كده ساعات باحس اني مش قادرة...في كلمة في زوري بتضيق عليه عيشته

ومش هارتاح إلا لو قلتها؟؟؟غالبا الكلمة دي طبعا بتبقى كلمة في حق حد متضايقة منه لأي سبب من الأسباب

طيب ايه المشكلة؟؟؟

المشكلة ان زوري بيضيق بالكلمة دي وفي نفس الوقت لو قلتها الحد اللي مضايقني هياخد

حسنات على حسابي يعني يضايقني وكمان ياخد حسنات مني- طبعا ده بفرض اني عندي حسنات وانه

مش هايحط من سيئاته عليا -قعدت استهديت بالله فكرت شوية كده ...ركزت... ايون كده

وقررت قرار خطير أني أحاول امسك لساني

لأني مش مستغنية عن حسناتي ومش ناقصة سيئات لو مكانش عندي

حسنات يعني -سلامٌ قولاً من ربٍ رحيم- و لأني بجد بجد - ده اللي بحاول أقنع نفسي بيه - مش هاتخنق

يعني لو بلعت الكلام اللي عايزة أقوله بكوبايتين أحتساب لثواب ترك الذنوب ....

و اللي عايز يضايقني منه لله

واللي بيجيب في سيرتي .....لأ طبعا مش هاسامحه ...مين دخل الفكرة دي في دماغكم

المهم انا قولت ايه في شوية حاجات كده بتضايق الواحد لما يجي يقلع عن موضوع الغيبة ...يا ريت لو مش قادرين

نبطل غيبة منساعدش على انتشارها ...يعني مثلا من الحاجات اللي بتدفع الواحد للغيبة

- إن واحد بتعزه يشتم شخص قدامك ساعات بيعرف يرد غيبته وساعات مش بيقدر ما هو أصله بيبقى غالبا مفروس من الراجل اللي انتوا مقطعين في فروته ...أو انه محرج منك فبيكتفي بعدم الرد لكن مش بيقدر يرد عن عرض أخوه...يا ريت متشتمش حد قدام واحد ناوي يقلع عن الغيبة

- في ناس مش بتحب تغتاب حد لكن تحت دافع إنه يبين أخلاصه وولائه لمبادئ الصحاب يضطر يغتاب ويجيب في سيرة الناس

ما هو إنت يا من ديشنا يا من ديش العدو

(هنا باقول للي بيحاول يقلع عن الغيبة لا تلومنك في الله لومة لائم وأختار صحابك كويس)

كنت عايزة أقول ايه كمان

امبارح كنت باكلم واحدة صاحبتي جزاها الله خير لفتت نظري للآية الكريمة

بسم الله الرحمن الرحيم


وَلْيَصْفَحُوا أَلا تُحِبُّونَ أَن يَغْفِرَ اللَّهُ لَكُمْ وَاللَّهُ غَفُورٌ رَّحِيمٌ "

22 سورة النور

الآية نزلت في سيدنا أبو بكر رضي الله عنه عندما قرر أن يؤتي قريبه الذي شارك في محنة الأفك من ماله جزاء ما فعل

فإذا بالله سبحانه وتعالى يقول له ألا تحبون أن يغفر الله لكم ....فيجيب الصديق رضي الله عنه بلى أحب أن يغفر الله لي

قالت لماذا لا نسامح بعض فما الذنب الذي قد يرتكبه أحد حتى نصاب بتلك العصبية التي تنتابنا على تلك الاشياء التي قد لا تستحق شيئا

وأكملت بأن الله كريم فكم نعصي وكم يغفر ألا نصفح كي يغفر الله لنا ......

يا ريت يا جماعة كل واحد عنده حاجة مضيقاه كلمة او موقف يبلع عليهم بكوبين أحتسااااااااب عسى الله أن يغفر لنا

عسى نكون من الكاظمين الغيظ والعافين عن الناس لأن الله يحب المحسنين

الخميس، 19 فبراير 2009

زي ما أنت والله ما أنت قايم ....

ايه العنوان الغريب ده ....مش عارفة ايه اللي فكرني بالجملة دي لما جيت اكتب الموضوع ده ...جملة غالبا بيقولها الواحد لصاحبه لو جاي يسلم عليه لما يشوفه أو يسيبه عشان ينزل ...والصاحب ده يكون قاعد في مكانه زي ما هو ....



زي ما أنت والله ما انت قايم ....

ايه المشكلة بقى ...لما تيجي تبتدي تغير ....لأ أقصد تطور حياتك وتطور من طريقتك في تناول الأمور وبعدين يطلع واد مش أمور" تامورة شعر الصدر " ويقولك أن طبيعي أنك متعرفش تتغير ولازم لما تتغير ترجع تاني محلك سر ....بس المشكلة مش في تامورة المشكلة في التمامير اللي جواك اللي ساعات يقولولك كوووووووول يا ماااااااان وبييس يا مان



متقلقش دي مشكلة جيل كامل أنت مش لوحدك اللي حاسس أنك مش راضي عن حياتك وأنك مش قادر تغيرها ....


زي ما انت بقى والله ما أنت قايم ...لا يا راجل هو قومتك يعني كانت هاتغير ايه ...


ساعات باحس أن المشكلة في إننا مش بندي لنفسنا فرصة عشان نتغير ....واحيانا بتبقى المشكلة ان الواحد عنده
فراغ يسمح له انه يقعد يسأل نفسه أنا ليه مش قادر اتغير لو كان عنده اللي يشغله كان غير من نفسه بما يتناسب
مع مسؤلياته اللي شاغلاه ......

تقوموا بالعافية - مش هاقول تقعدوا عشان أحنا مش ناقصين قعاد بقى - كل سنة وانتم طيبين

الجمعة، 16 يناير 2009

أبو حصيرة وأبو عصفورة


الحمد لله ابتدت العصافير تطير وبيأكدوا أنهم هايلغوا السنة دي الزيارة الغابرة
بتاعة اليهود لأبو حصيرة الراجل المسلم المغربي الغلبان اللي بعد ما أدفن أفترواعليه
وطلعوه يهودي وحخموه وكل سنة يجوا يزروه و يا سبحان الله على البركة اللي بتنزل
على مساحة تربته كل سنة لحد ما وصل وسعها 8400 متر مربع بعد ما كانت 350 متر
مربع...لا وبيفكروا يعملو فندق جمبها ...تفتكروا عشان يسهلوا على الصهاينة اللي
مبيخلفوش واللي معملوهم عمل عشان يجوا يتبركوا أصل هي ناقصة ...من قلة الأضرحة
والشرك المحلي كمان هايبقى شرك صهيوني وأحنا هبل عشان نصدق في ان اليهود بيصدقوا
طبعا في ابو الكرامات اللي حاخموه وجابوه عايم على حصيرة من بلاد المغرب العربي
لغاية دمنهور طب يسيبوا الكلام الأهبل ده للناس اللي ربنا يشفيها وبتصدق الكلام ده عندنا
يعني دور مجاذيب السيدة اللي بيلعبوه ده مش لايق عليهم
اللهم أنصرنا وريحنا منهم بقى

السبت، 10 يناير 2009

حملة لنصرة غزة

تبرع بيوم لأجل غزة (حملة لدعم غزة )

**أرقام حساب لجنة الإغاثة الإنسانية التابعة لنقابة الاطباء المصرية :
261363 بنك فيصل الإسلامي
- 20737/3/1 بنك قناة السويس
-500555 البنك الوطني
المصري العنوان :
دار الحكمة - 42 ش قصر العيني القاهرة تليفون : 27949946 - 27943166

نقابة الزراعين بالأسكندرية تقبل التبرعات المادية والعينية
وبايصالات رسمية عنوان النقابة:
5 شارع الدكتور عبد الحميد بدوى جامع ابراهيم محطة الرمل لجنة الاغاثة الزراعية

يا ريت يا جماعة الناس تدخل على الموقع ده (موقع جائزة نوبل)
نبعت لهم أعتراضات على منح شيمون بيريز جايزة نوبل عام 1994
ونطاب بسحب الجائزة منه ممكن منعملش حاجة بالاعتراض ده بس نبقى
سمعنا صوتنا للناس اللي برة يا ريت برضه نعمل أي حاجة على الـface book بالانجليزي
أو أي لغة تانية نعرف العالم ايه اللي بيتعمل فينا ...لو حد يقدر يبعت e-mail بالصور
لمعارفه من أنحاءالعالم
دي فكرة أختي بعد ما اتفرجت على برنامج الطبعة الأولى
أدخلوا على طول على contact us ومنها أبعتولهم على الايميل الموضح لو مش شغال أفتحوا
الأميل وابعتولهم على العنوان ده postmaster@nobel.noوهما كمان حاطين الفاكس بتاعهم
لو حد حابب يبعت لهم على الفاكس Fax: (47) 22 12 93 10

الأحد، 4 يناير 2009

عشان غزة وغير غزة


الحقيقة أنا من أول ما الموضوع ده أبتدا وأنا حاسة بحالة غريبة جدا
إحبااااااااااااااط ممزوج بشئ من اللامبالاة الموجعة والمقرفة
مش عشان اللي بيحصل في غزة بس لأ عشان كما اللي بيحصل في نفوسنا
يقول تعالى :
بسم الله الرحمن الرحيم
"
لَهُ مُعَقِّبَاتٌ مِّن بَيْنِ يَدَيْهِ وَمِنْ خَلْفِهِ يَحْفَظُونَهُ مِنْ أَمْرِ
اللَّهِ إِنَّ اللَّهَ لاَ يُغَيِّرُ مَا بِقَوْمٍ حَتَّى يُغَيِّرُواْ مَا بِأَنفُسِهِمْ وَإِذَا أَرَادَ
اللَّهُ بِقَوْمٍ سُوءًا فَلاَ مَرَدَّ لَهُ وَمَا لَهُم مِّن دُونِهِ مِن وَالٍ "
سورة الرعد الآية 11

بصوا يا جماعة عشان ما أطولش عليكم
مش هاقعد أقول ان المصايب بتصيبنا بذنوبنا وكل واحد بيعمل ذنب
ينوي يبطله نصرة لأخوانه في فلسطين ولا هاقول
للي بيشرب سجاير - بعيدا طبعا عن أنه بيدعم أقتصاد أسرائيل بجزء من تمنها
يبطلها هو اللي بيشتري منتجات يهودية - أن ذنبك ده بيصيبنا بيه مصيبة
ولا للي بتنزل من بيتها مش مراعية حدود ربها أن اللي بيحصل ده بذنبها
ولا للي بيغتابو في الناس عمال على بطال...ولا ..ولا ...ولا لستة طويلة
من الذنوب اللي أنا نفسي ربنا يعافيني من بعضها ...
مش هاقول الكلام ده كله
عشان البعض مجرد ما هاقول الكلمتين دول هايطلع ناس تقول
ياسـ لام هي دي المشكلة ماهم بيعملوا بلاوي ومع ذلك مبرطعين في الأرض

طيب خلينا في المفيد الناس دي قويت بأيه ؟؟
إتقان العمل >>كام موظف عندنا شايف شغله في ناس ماشفتش شغلها
ولا عرفته إلا لما خصخصوا مؤساساتهم وباعوا البلد..
كام واحد بيراعي ربنا في المسمى الوظيفي له كام واحد بيعمل اللي عليه بجد
بالعلم >>كام واحد بيحط في نيته نصرة الدين وهو بيذاكر
كام واحد بيطلب العلم لرفعة بلده
هو ليه اسرائيل البلد الوحيد - في نطاق علمي - اللي ملهاش فريق
كمان الناس دي مبتنساااااااااااااااااااااااااااااش
الرسول بعث مذكر ...لأن الذكرى بتنفع المؤمنين
للأسف بقينا ننسى ...إنما هما مش بينسوا
مش بنذكر نفسنا في الوقت اللي كل يوم بيسمعوا فيه لبعض أهدافهم
بأيه تاني ...اللي شايف أسباب تانية من فضلكم يدخل يقولها عشان
عايزيين ننصر دينا وغزة وغير غزة بشكل عملي لو سمحتم
يا رب أعنا على نفوسنا حتى لا تعن أعدائنا علينا
--------------------
*بالرغم من أحترامي للملكية الفكرية للناس اللي مش بتحب تداول
أعمالها بالشكل ده لكن فعلا أنا شايفة أن القصة دي هايكون مفيد قوي
لو قرأناها
سبحانك اللهم وبحمدك أشهد أن لا إلأه إلا أنت أستغفرك وأتوب إليك