الخميس، 19 فبراير 2009

زي ما أنت والله ما أنت قايم ....

ايه العنوان الغريب ده ....مش عارفة ايه اللي فكرني بالجملة دي لما جيت اكتب الموضوع ده ...جملة غالبا بيقولها الواحد لصاحبه لو جاي يسلم عليه لما يشوفه أو يسيبه عشان ينزل ...والصاحب ده يكون قاعد في مكانه زي ما هو ....



زي ما أنت والله ما انت قايم ....

ايه المشكلة بقى ...لما تيجي تبتدي تغير ....لأ أقصد تطور حياتك وتطور من طريقتك في تناول الأمور وبعدين يطلع واد مش أمور" تامورة شعر الصدر " ويقولك أن طبيعي أنك متعرفش تتغير ولازم لما تتغير ترجع تاني محلك سر ....بس المشكلة مش في تامورة المشكلة في التمامير اللي جواك اللي ساعات يقولولك كوووووووول يا ماااااااان وبييس يا مان



متقلقش دي مشكلة جيل كامل أنت مش لوحدك اللي حاسس أنك مش راضي عن حياتك وأنك مش قادر تغيرها ....


زي ما انت بقى والله ما أنت قايم ...لا يا راجل هو قومتك يعني كانت هاتغير ايه ...


ساعات باحس أن المشكلة في إننا مش بندي لنفسنا فرصة عشان نتغير ....واحيانا بتبقى المشكلة ان الواحد عنده
فراغ يسمح له انه يقعد يسأل نفسه أنا ليه مش قادر اتغير لو كان عنده اللي يشغله كان غير من نفسه بما يتناسب
مع مسؤلياته اللي شاغلاه ......

تقوموا بالعافية - مش هاقول تقعدوا عشان أحنا مش ناقصين قعاد بقى - كل سنة وانتم طيبين

هناك 4 تعليقات:

alfasla يقول...

تعرفي يانورانه

ان ليا كم يوم بشوف في العنوان ده
وبدخل ومش بلاقيه ..بقول في نفسي يابنتي ادخلي ثاني كده ..برضه مافيش فايده

اليوم بس شفته وبالصدفه ...!!

شوفتي دي اخرة عدم القومان لو قمتي زي الناس لكنت شفته قصدي شفتك اييييييييه زي بعضه بقا ..

اتكلمتي على التغيير يابنتي دي ليها خلفيات كثيره جدا ..في الي عاوز يتغير بس مايقدر يقاوم الحياة ..فبيحس انه كده احس وبلاش وجع دماغ


فيه الي بتيجي ضده دايما بس ده حيجبها في الأخير لو صبر يعني ^_*..

فيه الي مش عاوز يتغير ومش فارقه معاه اصلاً الهي تتفلق ..

ده بقا السائد عندنا في العالم العربي

اوكي مش عايزه ارغي كثير على رغم من ان موضوعك يستاهل ان الحد يتفرع فيه كثير ..بس ضيق الحال مأساتي ..

بالسلامه دلوقتي،،
والله زي ماأنت ما أنت قايمه

ناعومى يقول...

نوارانه
حبيبتى
بحب فضفضاتك الجميله اوى مع نفسك اللى بتتكلمى فيها بصوتك وبصوتنا
مش حعلق عن الاسلوب لان ليك اسلوب مميز فعلا
بس حقولك انى بحبك فى الله
وان كلامك بيعمل حاجه حلوه

نورانة يقول...

هنا الجميلة ..
أنا فعلا كنت منزلة الموضوع وبعدين حذفته فترة لأني كنت مضايقة أني لسة قاعدة ههههههههه
كلامك جميل وكنت عايزاك ترغي بس أنا عارفة فعلا قلة الوقت بتبقى عاملة ازاي
ربنا يكرمك ..دمتي بكل خير يا قمر

نورانة يقول...

نعنع
ربنا يخليكي يا قمر
مرورك الاحلى ...من بعض ما عندكم يا قمر