الأربعاء، 23 يونيو 2010

هو اللي بينا ايه ؟؟؟


سمعت معلومة زمان مفادها إن الطفل اللي بيرضع طبيعي أكثر ارتباطا لأمه وكلما زادت فترة الرضاعة كلما زاد انتماء الطفل لأمه

قعدت افكر في المعلومة دي وانا بسأل نفسي هو انا ليه باحب مصر؟؟

زمان كنت اقعد اتخانق انا وواحد صاحبتي عن علاقتنا بمصر واقولها لأ دي بلدنا لازم نحبها

تقولي اديني سبب أقولها محدش بيحب امه بأسباب والكلام بتاع الافلام ده

كنت آخر لما اتزنق في الكلام معاها اقولها حبي البلد بعيد عن الناس اللي بيبوظوا فيها

وتاخدني الحماسة و اقولها متقولش ايه ادتنا مصر قول هاندي ايه لمصر واحنا مش بندي ليها حاجة وبالتالي نقعد ساكتين

دلوقتي حقيقي حاسة ان مصر ادتنا على قفانا

انا معدتش عارفة احبها ازاي ..حد من الناس اللي لسة بتحب مصر تقولي

سبب يخليني افضل احبها غير انها بلدي من فضلكم ..عارفة انها بلدي وانها غلبانة

وانها صابرة على قرف الناس اللي فيها الناس اللي انا معدتش عارفة افصل بينهم وبين البلد زي ما كنت

عاملة زمان
طب البلد نفسها وحاجات كتير فيها معدلناش فيها حجات كتير بقت مش لأهلها
حقيقي مش عارفة افصل ما بين البلد وناسها طب هافصل بينها وبين مين والا مين .....

الفساد معادش مسؤل كبير ولا رجل اعمال واصل لأ الفساد بقى في موظف صغير ممكن يكون جارك حتى قريبك

فرد من افراد الامن المركزي اللي بيسلوا نفسهم في غير الوقت اللي بيخوفوا بعصيانهم اخواتهم في الشعب

بمعاكسة بنات زي اخواتهم ...الا من رحم ربي

بقى في شحات واقف يشد في ديل سايح وآخد من رمضان موسم شغل

بقى في عامل بسيط أو تاجر بيغلوا على الناس عشيتهم

بقى في عسكري مرور بيفتري على الناس بالجاكت البرتقالي والدفتر الاحمر

ناس اقرب ما يكونوا إليك

بقى فينا يوم ما بنسيب الفساد ده يستشري و بنتفرج بمنتهى السلبية مش ببرأ نفسي بس محتاجة لسبب يخليني

أرجع احس بأني مهتمة بالتغيير في البلد دي للأحسن ..عايزة ارجع اشوفها زي ما كنت باشوفها زمان

عايزة اشوفها وطن ..النعمة اللي اتحرم منها ناس كتير يتمنوا بس لو يقولوا ان لينا وطن

عايزة افتخر وانا باقول اني مصرية ..مش حاسة اني من أرخص البني آدمين في سوق المواطنين

عايزة سبب يخليني احس ان مصر مرضعتنيش لبن صناعي مغشوش

ربنا يصلح حالك وحالنا يا مصر ..

هناك 9 تعليقات:

fOsDö2ä يقول...

السلام عليكم و رحمة الله و بركاته
قبل أي حاجه كده ...
حمدالله ع السلامة .. منورة كل الدنيا ... :)

تعليقاً على كلامك ...
متهيألي للأسف الكلام ده لامس ناس كتير أوي .. خصوصاً اللي - كانوا - بيحبّوا مصر ... !!

أنا يمكن زيّك بالظبط ...
يمكن مصر مـ كانتش بـ تفرق معايا أوي .. بس عرفت غلاوتها لما سافرت و سبتها ...
من ساعتها كنت بـ أقول زيّك - حتى لو بيني و بين نفسي - أنا بحب مصر بس مش بحب كل ناسها ... !!
دلوقتي مش عارفه أحب مصر - من غير ناسها - إزاي ... !!

خالد سعيد مش أول ولا آخر حد حقه ضايع ... !!
للأسف بلدنا جامده أوي و مـ بتحبش تطلع غلطانه ...
و طبعاً خالد - الله يرحمه - مات مخنوق بـ لفافه فيها بانجو و طبعاً مـ حدش عمله أي حاجه .. دول كانوا بس بيحاولوا يسيطروا عليه !!
- كتر خيرهم برضو ! -
اتفرجي لو مـ كنتيش قريتي الخبر ده .. عشان تكتئبي كمان و كمان ... !!
http://www.youm7.com/News.asp?NewsID=244687&SecID=65

ههههههههههههههههه
و الله بجد حاجه غريبه ... !!
رغم إن المصري مهان فـ كل مكان ...
إلا إنه مهان فـ بلده أكتر من أي مكان ... !!
ع الأقل محمد مسلم اللي اتبهدل فـ لبنان .. النيابه قالت حقيقة رغم إنها ممكن مـ تجيش على أهواءهم ... !!
اتفرجي برضو ع الخبر ده ...
http://youm7.com/News.asp?NewsID=244388

يا فرحتي بـ حقنا الضايع ...
مش هـ أقول غير "حسبنا الله و نعم الوكيل".

لو عرفتي ترجعي تحبي مصر و لو شوية .. يبقى دليني ع الطريق ... !!

معلش طوّلت و عارفه إني مش مركزه ... !!
بس الحاجات المستفزه بقت في تزايد مستمر ... !!

fOsDö2ä يقول...

معلش ...
نسيت أقولك إن فكرة اللبن الصناعي دي عجبتني أوي ... :(

Marrokia يقول...

ماذا أقول لنورانة
لا يوجد ما يقال
فكلامك
يعبر عن كل ما قد يقال
كنت هنا
ودوما أنتظر كتاباتك
سلاموووووو

د.أحمد عثمان يقول...

نورانة
هي ايه مصر غير
الوالدين و الأعمام و الاخوال و الأصحاب
و الجيران و الاحباب و الابناء

و سجلي جنبهم ذكريات و وجوه البسطاء

مشكلتنا هو تسلط المنتفعين علينا
و عليها
و طول ما انا ساكت و انتي ساكتة و جاري ساكت
هيفضل المنتفع منتفع
و المتضرر متضرر

الدنيا ليست دار للرفاهية و المتعة
و لكن هي مكابدة و صراع

الناس اللي دفعت دمها في الحروب
دفعوه ليه و هما لم ينالوا و لن ينالوا منهم شيء
لكنهم ما فكروش هي تستاهل و لا لا
هما عملوا اللي عليهم و حرروا الارض من المحتل
الحل الوحيد امامنا
اننا نبدأ نفكر زيهم
ساعتها بس هنقدر نحررها من ايدي المنتفعين

جواهر حُرة يقول...

أنا لست مصرية ,و لذلك لا أعرف إن كان لي حق الرد على كلامك و لكني سأفعل رغم ذلك.
سألني الكثير نفس هذا السؤال:
-لماذا تحبين مصر!؟
و دائماً ما كنت أجيبهم بكثير من الأسباب..بسبب ناسها الذين يملؤن الجو خفة و مرح..بسبب جمالها الذي تحتاج العين دهور لتقدره..بسبب سعتها و تنوعها..بسبب و بسبب و بسبب!
و لا أصمت إلا إذا أصمتوني.
نعم أنا لا أتفق مع حكومة مصر ولا مع سياستها الخارجية و الداخلية ,و لكن هذا لم يتدخل أبداً مع حبي لها.
حاولي فصل الأمور و تقييمها من جديد و سترين الواقع من منظار الصواب.
شكراً لك أحببت أسلوبك المرح.

نورانة يقول...

فوسدقة حبيبة قلبي ..وحشاني جدا ...
و ىسفة اذا كنت قلبت عليكي المواجع
وباعتذر لكل اللي آذاهم البوست ده بس بجد كنت مخنوقة ...ربنا يرحمنا ويولي الصالحين المصلحين أمورنا يا رب ويصلح حالنا وحل الامة جميعها ..

نورانة يقول...

موراكية شكرا لتواجدك الكريم و ولنتضرع بصلاح الاحوال
بالماسبة مبااارك على المدونة الجديدة

نورانة يقول...

و الله يا دكتور أحمد انا بجد مبسوطة بوجود ناس لسة بتحب مصر بالشكل اللي حضرتك بتحبها بيه ...وعارفة ان انا مقصرة في حقها وان لسة في كتير نعمله ...بس انا والله مكانش كلامي من منطلق نطفش من البلد..انا بس كنت عايزة بافكر بصوت عالي عشان حد يفكر معايا ويقولي اغير تناولي للامور ازاي ...وربنا يقوينا جميعا ونقدر نعملها حاجة..

نورانة يقول...

جواهر حرة ..زسعيدة بمعرفتك و سعدت بتصفح مدونتك الجميلة..وشكرا لكي على مرورك الكريم ورأيك الجميل في مصر ملأها مصر بالصلاح و رد عنها كيد الكائدين بجد شكرا لكي