رمضان ...هاتوحشني

السلام عليكم ورحمة الله وبركاته

الحقيقة أحساس رائع بيتملكني لما بيجي رمضان ذلك الزائر الرائع يبدأ يتلاشى بمرور أول

أسبوع بدون أن أشعر كالعادة ....باحس أن وقته بيطير....وحزن شديد في آخر أيام

رمضان ....الضيف اللي باتمنى أنه مايفارقناش أبدا ....بجد جو غير الجو خالص مش

بيعكر صفوه أحيانا غير جريان الوقت بشكل غير طبيعي فيه وبعض المناظر اللي الواحد

بيشوفها عند الناس اللي لسة مش بيكونوا يا عيني عارفين أن رمضان جه هدانا الله وأياهم ...وبعض

الناس اللي بيعانوا من تأثير قلة التدخين وبيحبوا يثبتوا ان الشياطين بريئة من الخناقات اللي

بتحصل كل ما حد يحك على مناخيرهم .......بجد السنة دي حاسة ان رمضان واحشني

واحشني قوي ...حاسة أن واحشني قبل ما يجي وحاسة أنه هايوحشني لما يجي ...حاسة أني

عايزة أحس بكل دقيقة فيه ...مش عايزة دقيقة تفوتني لأني حاسة بالزعل اللي بينتابني لما

رمضان بيخلص من دلوقتي ....لأن كالعادة لازم تطلعلي حاجة تشغلني عن اللي عايزة أعمله في رمضان ....يمكن السنة دي أفضل شوية لأن جزء منه في الصيف بس ربنا يستر ....

الله المستعان

كل سنة وأنتم طيبين ومن ربنا قريبين ....وأشوفكم بعد رمضان إن عشت وكان لي عمر

ما تنسوش الدعاء لأخوانكم بظهر الغيب وللأمة الأسلامية....ما تنسوش الدعاء عموما

بلغنا الله واياكم رمضان

كتابي الحبيب

السلام عليكم ورحمة الله وبركاته

الرائعة فسدقة بعتتلي واجب تاني بعد ما فشلت بالنسبة لناس كتير في أداء الواجب الاول

أتمنى انها تسامحني بعد ما تصحح الواجب ده لأن ذاكرتي فعلا سيئة جدا هذه الايام

والاسئلة محتاجة واحد ذاكرته كويسة ....أو على الاقل محتاجة واحد عنده وقت يقعد يفتكر

والحقيقة الاتنين مش متوفرين خالص الايام دي ...أرجو منها المعذرة

ما اسم أول كتاب قرأته في حياتك بإستثناء القصص و الكتب الموجهة للأطفال؟
مش فاكرة على ما اعتقد كان إما رواية ليوسف السباعي غالبا أرض النفاق....

أو أعجب الرحلات في التاريخ لأنيس منصور مش فاكرة الحقيقة
حدثنا عن 3 كتب قرأتها و تمتعت بها .. و انصح الأخرين بقراءتها !!

كتير بس اللي جايين في دماغي دلوقتي

- كتاب لا تحزن لعائض القرني لم أقرأه بالكامل لكن حقا أنا أستمتع به للغاية وأنصح الناس

بقرائته فعلا لأنه بغير أحساسك من جوة بالحاجات اللي حواليك.

- كتب خالد محمد خالد رحمه الله (اللي قريته منها روعة روعة روعة )رجال حول الرسول

والخلفاء الراشدين

هذا الرجل يعطيك احساسا بما تقرأ ليس فقط كلمات رنانة عن أناس نورانين لا

أحساسا عالي بهم كأنك تعاصرهم ...وتختلج بك أحاسيسهم ...هذا ما أحسه من كتاباته

- كتاب عظماء في حياتي - هكذا أحسب أسمه لأن أختي سلفته لواحدة صاحبتها ضيعته ....ربنا

يسامحك يا عايدة عارفة أنه مش قصدك و مسمحاكي بس الكتاب كان تحفة -لعبد الوهاب

مطاوع رحمه الله ....لا أعرف من إن كان رحمة الله عليه قد درس التنمية البشرية لكن برؤيتي

الخاصة لهذا العلم على أنه فن القدرة على رؤية الاشياء بصور مختلفة إيجابية أُعد هذا الرجل

رائدا لهذا المجال ..دائما للحياة مع كلماته جانب رائع يستطيع أن يريك إياه ......
حدثنا عن كتاب قرأته و تمنينت انك لم تفعل ؟؟

ههههههههه كتير برضه بس اللي فكراه قوي كتاب فظيع شنيع مهما الناس شكروا فيه وعملوه مسرحية على مسرح الدولة مش قادرة ابلعه وباحس بالغثيان لأني قرأته وباستغرب من مقدرتي على اكمال تلك القصة السخييييييييييييييفة في رأيي الخااااااااااااااااص "أكليل الغار "مش فاكرة لمين لكنه كان لأحد الكتابات الشابة بمكتبة الاسرة ربنا يسامحني وأعتذر للكاتب ربما كان كتابه يحمل فكرة ما لكني فعلا كرهت كل دقيقة امضيتها في قرائة تلك القصة .....
الكتاب الذي تقرأه حاليا في حالة وجوده

كتاب لا تحزن لعائض القرني

وأفعل شيئا يا مت لعزيز نيسن

ــــــــــــــــــــــــــــــــــــــــــــــــــــــــــــــــــــــــــــــــــــ

أولا أشكر الجميلة الرائعة فسدقة على تمريرها الواجب لي. .....

حقيقي استمتعت بيه جدا واحتمال انزل كام بوست ملخصات للكتب اللي باحبها

ثانيا تنفيذا لباقي الواجب هاحوله على ست مدونين آخرين

القارئة الرائعة هنا والتي لا تقل روعة كقارئة متميزة عن جمال كتاباتها

الجميلة هنا صاحبة مدونة الفاصلة

و ناعومي الجميلة لسة محلتهوش بابعلتهولها تاني

وبابعته وانا مكسوفة جدا منها ....لهوندا صاحبة المدونة الرائعة للرغي فنون

وعشان يبقى فيه ديموقراطية هي ليها مطلق الحرية في انها تسعدني وتحله أو

ماتعبرنيش من أصله...

وبرضه للجميلة دكتورة أسماء علي ...

لحبيبة القمر صاحبة مدونة همساتي

وسناء الشهيرة ببيبا العجيبة صاحبة مدونة مغربية http://www.marrokia.canalblog.com/

يلا يا دوب الحق ابعت لهم التعليقات

كل سنة وأنا إلى الله أقرب ....بارغي مع نفسي

في مثل هذا السنة اللي فاتت كنت عمري اقل سنة ونزلت موضوع على أحد المنتديات كان بيتكلم عن لسة هاحكي أهو نسخة من الموضوع

" بسم الله الرحمن الرحيم
الحلقة الأولى "أحلامي"
السلام عليكم ورحمة الله وبركاته
وأنا على أعتاب عام جديد من سنوات عمري رأيت أن أتوقف برهة لأفكر ...ترى ماذا فعلت
بحياتي حتى الآن ...
عن إنجازاتي بحياتي عن إعمار الأرض كجزء لا يتجزء من وسائل العبادة .....
أقف لأجد أمة تلد أناس... ورجال يصنعون أمم ....
لا أقدر أن أصنع تاريخ وأمجاد تكتب بأحرف من نور كالصحابة ...

ولا أعرف إمكانية أن أكتشف
ذكاء خارقا متخف بعقلي لإستخرج معادلة لحساب قطر الكرة الأرضية
كـ"البيروني"

أو لأضع قواعد للغة كـ"سيبويه" أوحتى أضيف بحر آخر للشعر كـ"الأخفش" ...
حتى الآن لا أعرف كيف لعمر "مصطفى كامل" القصير أن يحتمل كل ما مر به من أحداث
بالتأكيد لن أغير من دستور بلدي كما فعل نضال" فيرونيكا جرين "

وأيضا لا أريد أن أصنع خلطة سرية للدجاج......
إذا ماذا أريد ؟؟؟
أريد أن أرى ما سأفعله لإعمار الأرض.. لا بل ما سنفعله ولرفعة أمتنا ....أريد مشاركاتكم ....
أعماركم .....أحلامكم ....ما حققتومه منها ....ما لم تحققوه بعد وتتمنون أن تحققوه
أحلم أن أخدم ديني و وطني ...حتى الآن لم أقدم لهما سوى الدعاءلكن مازال الحلم
مستمرا فأنا لم أمت بعد
حلمت وأحلم بأشياء أخرى لكن دعوني أرى ما تحلمون به"

كان هذا هو موضوعي بعد سنة كمان قعدت النهاردة أفكر حصل ايه في السنة دي عملت ايه لنفسي ولبلدي ولديني في السنة اللي عدت من عمري دي للأسف مش لاقيه حاجات كتير ..سنة بحالها عدت ومش لاقيالها تأثير كبير في حياتي ....لكن حابة أني أقيم السنة اللي فاتت دي بحلوها ومرها

1-يمكن أهم حاجة أني احببت في الله ...اتعرفت على اربع صديقات رائعات وأحببتهن في الله

أعتقد دي حاجة كويسة قوي

2- لسة عندي أمل ....مش عارفة إذا كان ده عيب والا ميزة لأن الامل من غير عزيمة بيعتبر طولة أمل

بس إن شاء الله يكون أمل بس...

3 - اتمنى أني أكون قدرت فعلا اكون أثرت في حياة حد للافضل من خلال عملي ..ولو أن النقطة دي يعني ذات اتجاهين هههههههه ربنا يستر إن شاء الله والتأثير يكون بالخير

............

تعالوا ندعي كل واحد السنة الجاية يكون محقق على الأقل حاجة يأمل أن ربنا يرضى عنه بيها

ويتقبلها منه