اخص عليك بقى كده يا عفيفي
عايز تاخد مني رغيفي
دانا جايبه بحرقه تلافيفي
سايب شغلي و كل ما أملك
واقف في طابور خنقة ومهلك
علشان حبي وعيني وكيفي
علشانه هو .....هو رغيفي
واقف في طابور زحمة ومضني
متحمل اذلال بيكيدني
علشان خاطر المح طرفه
احس بحرفه
على ايدي قبل التخطيفي
عايز تاخد مني حبيبي اللي انا بهواه
ويوماتي انا باستناه
بالساعة وأتنين وتلاتة
واعاني غتاتة
ومن ده تباتة
وحر الفرن يخلي دماغي في عز شتايا يحس بصيفي
واقف في طابور طالع عيني
هو العيش اللي مخليني
حابب أصبر...
لاجل ما يظهر...
بدر منور...
يمكن ناقص وزنه شوية
يمكن قمحته حبة قديمة
بس أنا راضي ...ده قدري في حبي
يمكن ممكن تاخد قلبي لكن عيشي ....
ده تخريفي
بعد ده كله تقولي اخوات لاجل ما تاخد مني رغيفي
اخص بجد عليك يا عفيفي
ليست هناك تعليقات:
إرسال تعليق